Tuesday, 6 August 2013

Quaid-E-Cricket : Misbah-ul-Haq


Kafi log soch rahe hoon gaye keh yeh Kaysa Unwan hai “Quaid-E-Cricket : Misbah-ul-Haq”, par yeh aaj kaal meri soch hai Pakistan kay Moujooda 39 Sala Kaptaan “ Misbah-ul-Haq” kay bare main, aik waqt tha jab mere Misbah kay bare main khuch naik khayalat nahin the, jin main 2007 kay T20 Word Cup kay baad ka aur 2011 ka ODI World Cup kay phelay aur khuch baad ka ERA shamil hai.

Main bhi un main shamil tha jinhoon nay Misbah ko  kafi bura bhala kaha aur match ki haar ka zimadaar tehraya aur aik typical Pakistani mind set ki tarah haar bardasht na kerte hovay fixing kay ilzam bhi laga diye, aap soch rahin hoon gaye keh yeh ZERO say HERO ka safar kaab shuru hova ho ga, to yeh baat hai January 2012 kay doran ki jab Pakistan , UAE main Test Match khel raha tha England kay khilaf , us White Wash kay baad jis main Misbah ki Captaincy aur Team performance zabardast thi mujhe khuch khuch Misbah acha lagnay laga. Aur ajeeb baat yeh thi keh Test kay baad ODI main jab England nay humain White Wash kiya to mujhe Misbah bura nahin laga, is ki wajah shahid yeh ho sakti hai keh TEST ki Jeet bohat bari thi, aik ayse mulk ko TEST main White Wash kerna jo us waqt Ranking main number 1 par tha, Jeet ka sehra Misbah kay sath sath Saeed Ajmal aur Abdur Rehman kay sir bhi jata hai jinhoon nay England kay garoor ko khaaq main mila diya.

Phir aik January aur aya , January 2013 aur Hum nay India main India ko Shikast di, Junaid, Irfan Ki Bowling aur Jamshed ki batting kay sath Misbah ki Captaincy naye is jeet main aik Aham kirdar nibahya. Ager hum Quaid-e-Cricket kay Stats par nazar dalyin to hum andaza ker sakte hain keh pechle 1 Saal say Misbah bohat achi form main hai, abhi taazi series jo West Indies main kheli gayi hai July 2013 main us main Misbah nay Qaum ko Jeet ki khushkhabri sunyi aur us kay sath sath 5 main say 4 ODIs main Half-Century banayin, aur 2013 main aab tak keh sab say zyada Runs banana ka izaaz apne naam kiya.

Misbah ko jis naam say us kay mukhalfin pukarte hain yani “TUK TUK” to un ko baas mera yeh paigham hai keh jitna bhi tum Misbah kay khilaf bolo, Match kay duran jab Misbah crease par hota hai to innhi “BASHERS” kay dil kay kisi konay main yeh baat hoti hai jo inhain mutmaeen kerti hai keh Misbah jab tak ARAA howa hai tab tak match bhi Humare hath main hai.

Main nay aik bahis kay duran kisi say kaha “Ager opners 5/10 runs bana ker pavilion laut jain chai peenay aur 3 number par Misbah entry kare to aap kya chahte ho who ate hi chokay chakay lagaye takeh who bhi jaldi out ho jaye aur Match hath say nikal jaye phir TV par chal raha hoo  keh Captain ki naqas batting kay badolat Pakistan match haar gaya” who banda sir hilata raha par akhir main phir bhi meri baat say ikhtilaf kiya.

Aik aur cheez abhi tak meri samjh main nahin ayi Match jeeto to Captain ko bahir nikal ker sara credit Team ko milta hai keh TEAM ki join efforts kay badolat PAKISTAN Match jeet gaya aur ager haar jaoo to us ka zimeh-daar akyla Captain, yeh to NA-INSAFI hai.

Abb zara  Quaid-e-Cricket Misbah kay Stats par aik nazar dalte hain..
  • Misbah-ul-Haq nay Pakistan ki taraf say 21 Test Match khelay, jis may say 10 Jeetay, 4 Hare aur 7 Draw kiye.
  • Misbah 2nd Pakistan Captain Hain Moin Khan kay baad jinooh nay Asia Cup Jeeta hai.
  • Misbah nay as a Captain 9 main say 5 series jeetin hain, yeh series khylin gayin thin New Zealand, Zimbabwe, Bangladesh, Srilanka aur England kay khilaf. Aur South Africa aur West indies kay khilaf aik aik series Draw kin aur Srilanka aur Southafrica kay sath khelay gayin aik aur series main shikast ka samna kerna perha.
  • Champions Trophy 2013 main jahan Pakistani Team nay Badtareen Performance ka muzahra kiya wahan sirf MISBAH nay apni Cool aur Calm Cricket jari rakhi aur Pakistan ki taraf say Leading run scorer rahe aur overall 6th rahe. Misbah nay 3 matches main 86.50 ki average say 173 Runs score kiye. Isi Champions trophy kay aik match main jo keh West Indies kay khilaf khela gaye unhoon nay apni Career Best Score Runs banaye aur naqable shikast (Not Out)rahe.
  • Haliya West Indies tour main jahan baki batsmen khass ker kay Top Order fail howa ,wahan Misbah nay apni Shandar batting jari rakhi aur 5 matches main say 4 main Half-Centuries score ki, tour kay end main un kay total runs the 260 jo keh 65.00 ki average say banaye gaye. Isi tour main do dafa Misbah MAN-OF-THE-MATCH banye aur Man-Of-Series ka title bhi apne naam kiya us kay sath sath series bhi jeetay 3-1 say.
  • West Indies kay haaliya Tour kay baad Misbah ODI  Batsmen ranking main 7th number par agye hain aur Saal 2013 kay leading run-getter hain 808 runs kay sath.
  • Misbah nay khali International Cricket main hi apna LOHA nahin manwaya balkeh unhoon nay Domestic Cricket main bhi Jeet ka silsila jari rakha , 2012-2013 ka domestic season un ka kamyaab tareen season tha. Misbah nay Faisalabad Wolves ki Captani ki Twenty20 Domestic tournament main aur SNGPL ki First-class (aur List-A) Domestic Tournament main. Misbah nay 2012/13 season kay sare domestic tournaments jeetay(Twenty20, first-class and list-A)
  • Sab say phele Misbah nay apni team SNGPL ko President Trophy main jitaya jo keh Younas Khan ki team HBL kay khilaf khelay gaye final match main hovi. Baad main Faysal Bank Super 8 main Shoaib Malik ki Sialkot Stallions ko haraya jo keh tournament ki sab say mazboot team thi aur jis nay Super 8 tournament ko 5 dafa jeeta tha .


So main apne is article ko roundup kerta hoon is note kay sath keh humare Quaid-e-Cricket Misbah ko Allah Pak isi tarah Form main rakhin aur jab tak who PAKISTAN kay liye khel sakte hain who apna 100% dyte rahin aur bilkul apne dur ki peak par Cricket say retire hoon (AMEEN).

***KHATAM SHOOD***

Tehrir : Yasser Bilal Kiyani
Note: Is Article ko likhnay kay liye main nay Wikipedia aur Cricinfo say madad li hai. 


Thursday, 28 March 2013

23 March (Resolution Day) Special FB Cover Page (For PC Blog)

23 March (Resolution Day) Special
Made For: Pakistani Cinema Blog Facebook Page
Software Used: Adobe Photoshop C2
Made on (Date): 22 March 2013



Saturday, 19 January 2013

Made new Blog "Perfect DesignZ" for Friend SMT

Blog/Site: Perfect DesignZ
Web shot of: Under Construction Page
Made For: Shemeem SMT
Software/Platform Used: Blogger
Template From: www.newbloggerthemes.com
Category: Construction